ប្រជា​នេសាទ​នៅក្នុង​ស្រុក​ជល​គិរី ខេត្តកំពង់ឆ្នាំង បាន​ឲ្យ​ដឹងថា បច្ចុប្បន្ន​ឡូត៍​នេសាទ​លេខ​១៣ និង​លេខ​១៤ ក្នុង​តំបន់​បឹង​ទន្លេសាប​កំពុង​ត្រូវបាន​មន្ត្រីរដ្ឋបាល​ជលផល​លក់​ឲ្យ​ក្រុម​ឈ្មួញ​ធ្វើ​អាជីវកម្ម​បំផ្លាញ​ធនធាន​មច្ឆជាតិ​យ៉ាង​មហន្តរាយ​ដោយ​គ្មាន​ញញើត​អ្វី​ទាំងអស់​។ ប្រជា​នេសាទ​បាន​លើកឡើងថា ការដែល​មន្ត្រីរដ្ឋបាល​ជលផល​ក្នុងស្រុក​ជល​គិរី ហ៊ាន​លក់​អតីត​ឡូត៍​នេសាទ​លេខ​១៣ និង​លេខ​១៤ ឲ្យ​ឈ្មួញ​ធ្វើ​អាជីវកម្ម​យ៉ាង​គឃ្លើន គឺ​ដោយសារ​មានការ​ឃុបឃិត​បើកដៃ​ពី​សំណាក់​លោក សោម ភិ​រុណ នាយ​ខណ្ឌ​រដ្ឋបាល​ជល​ផល​ខេត្តកំពង់ឆ្នាំង និង​លោក ងិន ហ៊ុន ប្រធាន​មន្ទីរ​បរិស្ថាន​ខេត្តកំពង់ឆ្នាំង ផងដែរ​ទើប​អ្វីៗ​អាច​ប្រព្រឹត្ត​ទៅដោយ​រលូន​។ ចំណែក​លោក ឈួ​រ ច័ន្ទ​ឌឿ​ន អភិបាលខេត្ត​កំពង់ឆ្នាំង កំពុង​សម្ងំស្ងៀម​ទុក​ឲ្យ​មន្ត្រី​ពុករលួយ​មួយចំនួន​ធ្វើ​អ្វីៗ​ស្រេច​តែ​អំពើ​ចិត្ត ហើយ​បទល្មើស​ប្រើ​ឧបករណ៍​នេសាទ​ខុសច្បាប់​ក្នុងស្រុក​ជល​គិរី កំពុង​កើតឡើង​យ៉ាង​រាលដាល​។

តាម​សេចក្ដីរាយការណ៍​ពី​ប្រជាពលរដ្ឋ​រស់នៅ​តំបន់​ក្បែរ​ដែន​ឡូត៍​នេសាទ​លេខ​១៣ និង​លេខ​១៤ បាន​ឲ្យ​ដឹងថា បច្ចុប្បន្ន​ក្រុម​ឈ្មួញ​ដែលមាន​ការឃុបឃិត​បើកដៃ​ពី​សំណាក់​មន្ត្រីរដ្ឋបាល​ជល​ផល កំពុង​ប្រើ​ឧបករណ៍​ខុសច្បាប់​ចាប់​ត្រី​យ៉ាង​មហន្តរាយ​។ ជាងនេះទៅទៀត​ឈ្ម​ញ​ដែល​ទទួលបាន​សិទ្ធិ​ពី​មន្ត្រី​ពុករលួយ​ក្នុងការ​គ្រប់គ្រង​អតីត​ឡូត៍​នេសាទ​លេខ​១៣ និង​លេខ​១៤ បានធ្វើ​ឲ្យ​ប៉ះពាល់​យ៉ាងខ្លាំង​ដល់​ប្រជាពលរដ្ឋ​ដែល​ធ្វើដំណើរ​ឆ្លងកាត់​ទៅធ្វើ​ស្រែ​ចម្ការ​ចិញ្ចឹមជីវិត​។ ទន្ទឹមនឹងនេះ​មន្ត្រី​អាជ្ញាធរ​ឃុំ និង​មន្ត្រី​អាជ្ញាធរ​ស្រុក ធ្វើ​មិនដឹងមិនឮ​អ្វី​ទាំងអស់​ក្នុងខណៈដែល​មន្ត្រីរដ្ឋបាល​ជលផល​ក្នុងស្រុក​ជល​គិរី ឃុបឃិត​លក់​អតីត​ឡូត៍​នេសាទ​លេខ​១៣ លេខ​១៤ ឲ្យ​ឈ្មួញ​ធ្វើ​អាជីវកម្ម​យ៉ាង​គគ្រឹកគគ្រេង​នាពេល​បច្ចុប្បន្ននេះ​។

ជុំវិញ​បញ្ហា​ខាងលើនេះ​ប្រជា​នេសាទ​ជា​លក្ខណៈ​គ្រួ​សារបាន​អំពាវនាវ​ឲ្យ​លោក វេ​ង សាខុន រដ្ឋមន្ត្រី​ក្រសួងកសិកម្ម ក៏ដូចជា​លោក អេង ជា​សាន អគ្គនាយក​រដ្ឋ​បាលជ​ល​ផល ចាត់វិធានការ​ទប់ស្កាត់​អំពើពុករលួយ​និង​ទង្វើ​មិន​ប្រក្រតី​របស់​មន្ត្រីរដ្ឋបាល​ជ​ល​ផល ក្នុងស្រុក​ជល​គិរី ខេត្តកំពង់ឆ្នាំង ជាបន្ទាន់​។ ដោយហេតុថា សព្វថ្ងៃនេះ​ពួកគេ​លក់​អតីត​ឡូត៍​នេសាទ​លេខ​១៣ លេខ​១៤ ឲ្យ​ឈ្មួញ​ធ្វើ​អាជីវកម្ម​បំផ្លាញ​ធនធាន​មច្ឆជាតិ​យ៉ាង​មហន្តរាយ ហើយ​ការដែល​ពួកគេ​ហ៊ាន​ធ្វើ​អ្វីៗ​តាម​អំពើ​ចិត្ត​គឺមាន​ការឃុបឃិត​បើកដៃ​ពី​សំណាក់​លោក សោម ភិ​រុណ នាយ​ខណ្ឌ​រដ្ឋបាល​ជល​ផល​ខេត្តកំពង់ឆ្នាំង ក៏ដូចជា​លោក ងិន ហ៊ុន ប្រធាន​មន្ទីរ​កសិកម្ម​ខេត្តកំពង់ឆ្នាំង ដែល​ល្បីល្បាញ​ខាង​ប្រព្រឹត្ត​អំពើពុករលួយ​ផងដែរ​។

ជាក់ស្ដែង​បច្ចុប្បន្ននេះ​ប្រជាពលរដ្ឋ​មិនអាច​ចូលទៅ​នេសាទ​ក្នុង​អតីត​ឡូត៍​នេសាទ​លេខ​១៣ និង​លេខ​១៤ នោះបានទេ​ហើយ​សូម្បីតែ​ធ្វើដំណើរ​ឆ្លងកាត់​ដើម្បី​ទៅធ្វើ​ស្រែចម្ការ ក៏ត្រូវ​ក្រុម​ឈ្មួញ​បង្ក​ការរំខាន​យ៉ាង​ពេញបន្ទុក​ទៀតផង​៕

លោក អេង ជាសាន អគ្កនាយករដ្ឋបាលជលផល


ប្រភព៖ មនសិកាខ្មែរ